ភ្នំពេញ៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានលើកឡើងថា ការគោរពស្រឡាញ់វប្បធម៌ជាតិ ជាពាក្យងាយស្រួលនិយាយ តែដើម្បីបញ្ជាក់ពីក្តីស្រឡាញ់ពិត ពោល ត្រូវមានចំណេះដឹង និងយល់ដឹងពីសិល្បៈវប្បធម៌ជាតិ។
ថ្លែងនៅក្នុងពិធីសំណេះសំណាលជាមួយសិល្បករ សិល្បការិនីក្នុងពិធីអបអរសាទរទិវាវប្បធម៌ជាតិ ៣មីនា នាល្ងាចថ្ងៃទី៧ ខែមីនា ឆ្នាំ២០២៤ សម្តេចធិបតីលើកឡើងដូច្នេះថា៖ «ពាក្យថាគោរពស្រឡាញ់វប្បធម៌ជាតិ ជាពាក្យងាយស្រួលនិយាយ ប៉ុន្តែដើម្បីឱ្យមានការគោរពស្រឡាញ់ពិត ប្រាកដជាដំបូងយើងត្រូវមានចំណេះដឹង និងត្រូវយល់ដឹងឱ្យបានល្អអំពីសិល្បៈ វប្បធម៌ជាតិ និងការចូលរួមគ្រប់រូបភាព ក្នុងការការពារ និងលើកស្ទួយវប្បធម៌ជាតិយើង»។
សម្តេចធិបតីបន្តថាតម្រូវការនៃការចូលរួមរបស់យុវជន ក្នុងវិស័យសិល្បៈវប្បធម៌ គឺជារឿងសំខាន់ដើម្បីសេដ្ឋកិច្ចសង្គម និង ការទប់ស្កាត់អំណាចនៃការឆ្លងរាលដាលរបស់វប្បធម៌ដទៃ ដែលអាចប៉ះពាល់ដល់លក្ខណៈដើមនៃវប្បធម៌។
សម្តេចធិបតីគូសបញ្ជាក់ថា វិស័យសិល្បៈ និងវប្បធម៌ ជាផ្នែកមួយនៃអាទិភាពរបស់រាជរដ្ឋាភិបាល សំដៅទៅដល់កិច្ចការការពារអត្តសញ្ញាណជាតិ និងប្រជាជន និងម្យ៉ាងទៀតដើម្បីពង្រឹង និងបង្វែរទិសវិស័យសិល្បៈឱ្យក្លាយទៅជាវិស័យសកម្ម ចូលរួមដោយផ្ទាល់ និងប្រយោលដល់កំណើនសេដ្ឋកិច្ច៕